On the Resurrection of Christ

'Christ in Limbo', 1440s, by Friedrich Pacher (1435-1508)

Done is a battell on the dragon blak,
Our campioun Chryst confountet hes his force;
The yettis of hell ar brokin with a crak,
The signe triumphall rasit is of the croce,
The divillis trymmillis with hiddous voce,
The saulis ar borrowit and to the blis can go,
Chryst with his blud our ransonis dois indoce:
Surrexit Dominus de sepulchro.
 
Dungin is the deidly dragon Lucifer,
The crewall serpent with the mortall stang;
The auld kene tegir with his teith on char,
Quhilk in a wait hes lyne for us so lang,
Thinking to grip us in his clows strang;
The mercifull Lord wald nochrt that it wer so,
He maid him for to felye of that fang:
Surrexit Dominus de sepulchro.
 
He for our saik that sufferit to be slane,
And lyk a lamb in sacrifice wes dicht,
Is lyk a lyone rissin up againe,
And as gyane raxit him on hicht;
Sprungin is Aurora radius and bricht,
On loft is gone the glorius Appollo,
The blisfull day depairtit fro the nicht:
Surrexit Dominus de sepulchro.
 
The grit victour agane is rissin on hicht,
That for our querrell to the deth wes woundit;
The sone that wox all paill now schynis bricht,
And dirknes clerit, our fayth is now refoundit;
The knell of mercy fra the hevin is soundit,
The Christin ar deliverit of thair wo,
The Jowis and thair errour ar confoundit:
Surrexit Dominus de sepulchro.
 
The fo is chasit, the battell is done ceis,
The presone brokin, the jevllouris fleir and flemit;
The weir is gon, confermit is the peis,
The fetteris lowsit and the dungeoun temit,
The ransoun maid, the presoneris redemit;
The feild is win, ourcumin is the fo,
Dispulit of the tresur that he yemit:
Surrexit Dominus de sepulchro.

William Dunbar, ca.1465-1520

campioun | champion          yettis | gates          trymillis | tremble          borrowit | ransomed
indoce | endorse          Dungin | struck down          on char | ajar          felye of that fang | come short of that booty
dicht | made ready          raxit him | raised himself          On loft | aloft          done ceis | made to cease
jevellouris fleit and flemit | gaolers affrighted and put to fright          temit | emptied          yemit | kept